Mkhitaryan var einn af fyrstu leikmönnunum sem Mourinho fékk til United er hann kom til félagsins frá Dortmund á rúmar 26 milljónir punda. Hann olli vonbrigðum hjá United og var farinn til Arsenal 18 mánuðum síðar.

Það voru sögusagnir um að þeir hafi ekki náð vel saman hjá United en það stoppaði ekki Mkhitaryan frá því að skrifa undir eins árs samning við Roma eftir að Mourinho tók við.

„Það sem gerðist í Manchester verður eftir í Manchester," sagði Mkhitaryan um tímann sinn hjá United undir stjórn Mourinho.

„Við spjölluðum eins og fullorðið fólk, við viljum báðir það sama, að vinna eitthvað með Roma. Það er það eina sem skiptir máli í ár. Hann er sama manneskjan en hann er með meiri löngun í að vinna en hjá United. Þjálfari eins og hann gefst aldrei upp, hann vill alltaf vinna."