Leiðtoginn Rooney tekur við bandinu til frambúðar

Sóknarleikmaðurinn Wayne Rooney fékk mikið lof fyrir frammistöðu sína í fyrsta leiknum með Derby, <a href="https://fotbolti.net/news/02-01-2020/championship-fyrirlidinn-rooney-lagdi-upp-i-fyrsta-leiknum" target="_blank">sigrinum gegn Barnsley</a> í gær.

Will Unwin, íþróttafréttamaður Guardian, hrósar leiðtogahæfileikum Rooney. Þessi 34 ára leikmaður tók við fyrirliðabandi Derby og hafði mikil áhrif á spilamennsku liðsins.

Phillip Cocu, stjóri Derby, staðfestir að Rooney sé orðinn fyrirliði liðsins til frambúðar.

<i>„Í augum margra er hann markaskorari en skilningur hans á leiknum er ótrúlegur. Ég er hrifinn af spilamennsku hans því hann er ekki upptekinn af sjálfum sér, hann vinnur líka að því að koma samherjum sínum í góðar stöður,"</i> segir Cocu.

Rooney lagði upp mark í leiknum og átti einnig þátt í hinu marki Derby.

Derby er í 17. sæti í Championship-deildinni en það eru átta stig upp í umspilssæti. Hlutirnir geta verið fljótir að breytast í þessari deild og möguleiki á umspili er enn til staðar. Bjartsýnin hefur allavega aukist eftir komu Rooney.