„Sólon sendi mér skilaboð og sagði hve leitt sér þætti þetta og ég veit að hann hefur verið alveg í rusli yfir þessu. Ég sagði honum að ég bæri engan kala til hans," segir Hallgrímur Jónasson, spilandi aðstoðarþjálfari KA, í viðtali við Víði Sigurðsson í Morgunblaðinu í morgun.

Hallgrímur er fótbrotinn, með slitið krossband og skaddað liðband í hné eftir bikarleik gegn Leikni í síðasta mánuði. Sólin Breki Leifsson, sóknarmaður Leiknis, rann þá á vellinum og skall á Hallgrími af miklum þunga.

„Ég er líklega búinn að skoða þetta þúsund sinnum og endalaust hugsað um hvað ég hefði getað gert öðruvísi. Strákurinn var peppaður, að spila gegn úrvalsdeildarliði, og ætlaði eflaust bara að láta finna vel fyrir sér. Hann átti aldrei möguleika í boltann en ég veit að þetta var ekki ásetningur og hann rann í lokin áður en hann lenti á mér."