Berglind Rós í leik með Fylki í sumar.
„Þetta var mjög skemmtilegur leikur og sérstaklega seinni hálfleikur þar sem liðin skipust á að skora. Þetta var mjög ljúft og sætur sigur," sagði Berglind Rós Ágústsdóttir fyrirliði Fylkis eftir 4 - 2 sigur liðsins á Þór/KA í Pepsi Max-deild kvenna í kvöld.
Lestu um leikinn: Fylkir 4 - 2 Þór/KA
Leikurinn var nokkuð jafn í fyrri hálfleik en í þeim síðari byrjaði Þór/KA manni færri vegna veikinda leikmanns auk þess sem Margrét Árnadóttir fékk að líta rauða spjaldið fyrir brot á Cecilíu Rán Rúnarsdóttur markverði Fylkis í byrjun hálfleiksins.
„Ég var fyrir aftan Sessu og hún sparkaði í hana. Ég var ekki viss hvort dómarinn hafi séð það og hann virðist hafa gert það og gaf rautt. Mér fannst það sanngjarnt en margir hafa sína skoðun. Þá vorum við manni fleiri og náðum að spila betur þar til í lokin þegar þær voru mjög grimmar.
Berglind Rós hefur alla jafna spilað í hjarta varnarinnar hjá Fylki en var færð á miðjuna í dag og átti stórleik.
„Mér finnst mjög skemmtilegt á miðjunni því þá fæ ég að vera með sóknarlega," sagði hún. „Ég er mjög fín báðum megin en finnst gaman á miðjunni. Við vorum að prófa nýtt leikkerfi sem mér fannst koma vel út í dag og vona að við höldum því áfram."
Sem miðjumaður átti Berglind Rós upp tvö marka Fylkis með frábærum fyrirgjöfum fyrir markið.
Nánar er rætt við hana í sjónvarpinu að ofan þar ræðir hún einnig atvik þar sem Þór/KA skoraði frá miðju og Fylkisstúlkur töldu brotið á Cesilíu.
Athugasemdir
