„Ég var mjög ánægður með þennan leik, við nýttum tímann vel í aðdragandanum, gott ferðalag til Hvíta-Rússlands. Við vorum ferskir og hugrakkir eins og við lögðum upp með og náðum að keyra á það sem við viljum gera. Þetta var efnileg fyrsta frammistaða," sagði Davíð Snorri.

Út af pólítískum ástæðum var ekki hægt að fljúga til Hvíta-Rússlands og því var lent í Varsjá í Póllandi og farið til Hvíta-Rússlands með rútu.

Hákon Arnar Haraldsson kom sterkur inn og skoraði bæði mörk liðsins. „Ég var að sjálfsögðu mjög ánægður með hann og sýnir bara mikilvægi þess að vera klárir, þetta getur komið hvenær sem er að eitthvað komi upp og Hákon nýtti tækifærið svo sannarlega vel."

Það kom aðeins á óvart að hinn feykilega efnilegi Kristian Nökkvi Hlynsson hafi byrjað sinn fyrsta U21 landsleik. Hver var hugmyndin á bakvið það?

„Kristian stóð sig feykilega vel á æfingum og passaði vel í það hlutverk sem við viljum að þessi leikstaða á vellinum geri. Hann nýtti tækifærið sitt líka vel. Hann er spennandi eins og mjög margir leikmenn hérna hjá okkur, flottir strákar."

Það var enginn miðvörður kallaður inn í staðinn fyrir Finn Tómas sem er meiddur. Er það eitthvað vesen fyrir morgundaginn?

„Við vorum 'coveraðir' svo sem fyrir en Hjalti [Sigurðsson] getur leyst stöðurnar sem eru þarna aftarlega á vellinum, þótt hann haldi að hann geti verið líka framar."

Róbert Orri Þorkelsson er einnig meiddur, er kannski ekki mikið til af miðvörðum á þessum aldri?

„Það er líka þannig að við erum að leitast eftir ákveðnum eiginleikum hvernig við viljum spila og þótt þú spilir kannski ekki miðvörð beint þá geturu flakkað aðeins á milli. Það er líka 'option' fyrir ferlana hjá mönnum að geta kannski spilað meira en eina stöðu. Við erum bara ánægðir með það sem við höfum," sagði Davíð Snorri.

Í lok viðtals var hann spurður út í leikinn á morgun.

Viðtalið í heild má sjá í spilaranum hér að ofan.