Bjarki Steinn Bjarkason spilaði fyrstu 56 mínúturnar er Foggia vann gríðarlega dramatískan sigur á Pescara í undanúrslitaleik umspilsins um sæti í Serie B deildinni á Ítalíu.
Foggia lenti undir á þriðju mínútu leiksins en tókst að gera jöfnunarmark á 97. mínútu til að knýja leikinn í framlengingu.
Heimamenn í Pescara tóku forystuna á ný í upphafi framlengingarinnar en Foggia jafnaði á 115. mínútu og því var blásið til vítaspyrnukeppni.
Foggia klúðraði spyrnu númer tvö og þrjú en það sakaði ekki því liðsfélagar Bjarka Steins unnu vítaspyrnukeppnina 4-3 og tryggðu sér þar með sæti í úrslitaleiknum. Foggia mætir því Lecco í úrslitaleik um sæti í Serie B.
Foggia á heimaleik 13. júní og verður útileikurinn spilaður í Lecco þann 18. júní.
Pescara 2 - 2 Foggia (4-4 samanlagt)
3-4 í vítaspyrnukeppni
Alfons Sampsted fékk þá að spila síðasta korterið er Twente gerði 1-1 jafntefli við Sparta Rotterdam í úrslitaleik um sæti í Sambandsdeild Evrópu í haust.
Heimamenn í Rotterdam tóku forystuna í upphafi síðari hálfleiks en Twente náði að gera jöfnunarmark í uppbótartíma.
Seinni leikurinn fer fram á heimavelli Twente næsta sunnudag. Þar geta Alfons og félagar tryggt sér sæti í Sambandsdeildinni með sigri.
Sparta Rotterdam 1 - 1 FC Twente
