Pepsi Max-kvenna: Sveindís frábær í sigri Breiðabliks

Breiðablik fékk í kvöld þrjú mikilvæg stig í Pepsi Max-deild kvenna en liðið spilaði við Stjörnuna á heimavelli sínum, Kópavogsvelli.

Blikar eru að berjast á toppnum ásamt Val en fjögur stig skildu liðin að fyrir viðureignina eftir sigur Vals á Selfossi fyrr í kvöld.

Þær grænklæddu skoruðu fyrsta mark leiksins en Sveindís Jane Jónsdóttir kom boltanum í netið eftir hornspyrnu þegar 16 mínútur voru komnar á klukkuna.

Staðan var 1-0 þar til á 40. mínútu er Aníta Ýr Þorvaldsdóttir jafnaði fyrir Stjörnuna eftir klaufaleg mistök Blika. Rakel Hönnudóttir átti í raun stungusendingu á Anítu sem nýtti sér mistökin og jafnaði metin.

Á 64. mínútu var staðan orðin 2-1 fyrir heimastúlkum en Sveindís skoraði þá sitt annað mark fyrir Blika eftir aðra hornspyrnu.

Rakel sjálf bætti svo upp fyrir eigin mistök fyrr í leiknum og innsiglaði 3-1 sigur Breiðabliks á 84. mínútu eftir undirbúning frá Sveindísi.

Blikar eru nú með 33 stig í öðru sæti deildarinnar, einu stigi á eftir Val en eiga þó leik til góða.