Rúnar Páll, þjálfari Fylkis, var að vonum kampakátur eftir að hans lið tryggði Lengjudeildartitilinn eftir öruggan 4-0 sigur á lánlausum Vogamönnum.
„Við settum okkur tvö markmið fyrir þetta tímabil. Það var að fara upp um deild og spila með þeim bestu. Síðan að vera meistarar í þessari deild. Við náðum þeim, það er ótrúlega gaman að ná markmiðum sínum.”
Lestu um leikinn: Fylkir 4 - 0 Þróttur V.
Rúnar hélt svo áfram að tala um hve stoltur hann er af sínu unga liði.
„Það voru miklar breytingar á Fylkisliðinu í fyrra vetur. Við erum búnir að æfa vel og það skilaði sér í frábæru sumri og við skorum yfir 60 mörk í deildinni."
Spurður út í hvað liðið þarf að gera fyrir komandi tímabil í Bestu deild. Svaraði hann því á yfirvegaðan hátt.
„Við þurfum að bæta okkur á ýmsum vígstöðum varðandi varnarleik og sóknarleik og við gerum það í vetur."
Rúnar er mjög ánægður með Fylki og það sem er í gangi hjá félaginu en hann vill gera ennþá betur.
„Það er frábær umgjörð hérna. Völlurinn er æðislegur, þetta gerist ekki betra á Íslandi þessi umgjörð, þessi vallaraðstæður. Það er margt hægt að byggja á. Það þarf margt að haldast í hendur til að ná árangri. Góður leikmannahópur, góð umgjörð í kringum leikmannahópinn. Þetta er fjárhagslega sterkt félag, þannig við þurfum að búa til meiri peninga."
Rúnar sagði margt til viðbótar þess sem stendur hér að ofan. Viðtalið í heild sinni má sjá í spilaranum hér að ofan.
