Ábendingar um að sami maður hafi fengið tveggja ára bann frá KSÍ 2015

„Ég var á hliðarlínunni og var því ekki í hitanum en það sem strákarnir segja mér og vinir okkar í Skallagrími eru sammála okkur þá varð smá hiti og einhverjar tæklingar. Í kjölfarið snýr leikmaður númer fimmtán í Skallagrími [Atli Steinar Ingason] sér við og segir 'drullastu heim til Namibíu' við Gunnar Jökul Johns, leikmann okkar," sagði Viktor Hugi.

„Kormákur [Marðarson] leikmaður okkar, hafði heyrt fimm mínútum áður, sama einstakling [númer 15] kalla Gunnar 'apakött'. Kormákur spurði númer 15 hvað kallaðiru hann og hann endurtók 'apaköttur'. Þetta er leiðinlegt mál."

Twana Khalid Ahmad var dómari leiksins og talaði hann ensku við leikmenn í leiknum. Hann skildi því ekki hvað fór fram á milli leikmanna. Atvikið átti sér stað í byrjun seinni hálfleiks í leiknum.

Rætt var um málið í útvarpsþættinum Fótbolta.net á X-inu 977 núna áðan og þar kom fram að borist hafa ábendingar um að þetta sé ekki í fyrsta sinn sem umræddur leikmaður brýtur af sér. Talið er að þetta sé sami maður og gerðist sekur um kynþáttafordóma sem áhorfandi á leik á Blönduósi árið 2015.

„Ekki bara á hann að hafa kallað Gunnar Jökul apakött, heldur spurði leikmaður Berserkja brotamanninn: 'Hvað sagðirðu?' Þá endurtók hann þetta. Það er ekki eins og þetta hafi gerst í hita leiksins," sagði Tómas Þór Þórðarson í útvarpsþættinum.

Fordæmin fyrir kynþáttafordómum hjá fótboltanum í íslenskum fótbolta eru fimm leikja bann.

„Við höfum fengið ábendingar um að þessi maður sem er sakaður um þessi ummæli hafi fengið dóm frá KSÍ, árið 2015 sem áhorfandi á Blönduósi á leik Kormáks/Hvatar og KB. Þá fékk hann tveggja ára leikvallabann," sagði Elvar Geir Magnússon og bætti við: „Ef að það er rétt þá er hann í annað sinn að koma inn á borð KSÍ fyrir kynþáttafordóma."

„Við fáum þessar ábendingar, meðal annars frá mönnum á Blönduósi. Þetta er risamál. Svona maður þarf þá bara að fá aðstoð, og fræðslu."

Skallagrímur hefur gefið út yfirlýsingu sem má lesa hérna.