Spánn: Diego Costa afgreiddi Betis - Meistaradeildarsæti tryggt

Atlético Madríd er búið að tryggja sæti sitt í Meistaradeild Evrópu eftir að hafa unnið Real Betis 1-0 í kvöld.

Liðið hefur spilað frábæran fótbolta á þessu tímabili en ekki þó tekist að halda í við Barcelona og Real Madrid.

Tvö mörk voru dæmd af Atlético í leiknum eftir að VAR skoðaði atvikin. Fyrst um miðjan fyrri hálfleikinn var tekið mark af Angel Correa en Marcos Llorente var þá brotlegur í aðdragandanum og markið dæmt af.

Alvaro Morata kom þá boltanum yfir Dani Martin í markinu og í netið en eftir afar langa bið þá ákvað VAR að dæma rangstöðu..

Það varð svo verra fyrir Atléticó er Mario Hermoso var rekinn af velli á 57. mínutu en þrátt fyrir mótlætið tókst Diego Costa að skora sigurmarkið á 74. mínútu.

Aftur var markið skoðað en dæmt gilt og lokatölur því 1-0. Atlético er í 3. sæti með 66 stig, þremur stigum meira en Sevilla sem er í 4. sæti og 9 stigum meira en Villarreal sem er í fimmta sæti. Það gilda innanbyrðisviðureignir í deildinni og er því Atlético búið að tryggja sæti sitt í Meistaradeild Evrópu.