Ingvar Ásbjörn Ingvarsson skoraði eina markið þegar Leiknir R. vann Fylki 1-0 í Inkasso-deildinni í kvöld.
Lestu um leikinn: Leiknir R. 1 - 0 Fylkir
„Frábær barátta, frábær sigur. Þetta eru skemmtilegustu leikirnir, skora 1-0 og halda það út. Þetta var hörkuleikur. Fylkir er með frábært lið og það eru miklar líkur á þeir fari upp," segir Ingvar.
Þrátt fyrir að Leiknir hafi þannig lagað að engu að keppa í deildinni vantaði ekki viljann og baráttuna í Breiðhyltinga í kvöld.
„Við erum ákveðnir í að klára okkar leiki. Það er engin pressa á okkur. Við höldum bara áfram og vinnum fleiri leiki. Við ætlum bara að vinna rest. Þegar það er engin pressa á okkur virðumst við spila best."
Ingvar skoraði tvö gegn Leikni Fáskrúðsfirði á dögunum og er nú kominn með þrjú mörk í tveimur síðustu leikjum.
„Ég tel mig vera markaskorara og þetta er að ganga upp. Þegar ég fæ spiltíma þá skora ég."
Viðtalið má sjá í heild í sjónvarpinu hér að ofan en þar er Ingvar, sem er uppalinn FH-ingur, meðal annars spurður út í bikarúrslitaleik FH og ÍBV á morgun.
Athugasemdir
