Þorlákur Már Árnason þjálfari ÍBV var kátur eftir góðan sigur á heimavelli gegn KR í Þjóðhátíðarleiknum í Bestu deildinni í dag.
Lestu um leikinn: ÍBV 2 - 1 KR
Eyjamenn skoruðu sigurmarkið á 90. mínútu eftir að hafa verið sterkari aðilinn spilandi flottan skyndisóknarbolta.
„Þetta var frábær leikur hjá ÍBV í dag og þá sérstaklega seinni hálfleikurinn. Við fengum urmul marktækifæra til þess að klára þennan leik," sagði Láki að leikslokum. „Þó það hafi verið skemmtilegt að klára þetta í uppbótartíma þá hefði heilsan manns viljað hafa þetta öðruvísi."
Láki hrósaði KR-ingum eftir leik þó að lærlingar Óskars Hrafns Þorvaldssonar sitji óvænt í fallsæti með 17 stig eftir 17 umferðir. Hann hrósaði einnig Oliver Heiðarssyni fyrir góða frammistöðu eftir endurkomu úr meiðslum.
„KR er svo einstakt fótboltalið, þeir spila besta fótboltann í deildinni það er bara þannig. Þeir eru hrikalega vel spilandi og þú þarft bara að þjást. Við höfum spilað þrisvar sinnum við þá í ár. Flest lið eru búin að þjást á móti KR í sumar. Auðvitað er hægt að vinna þá eins og taflan sýnir.
„Við mættum þeim líka í vetur og töpuðum þá 6-3 og maður hugsaði á þeim tímapunkti: 'Vá, hvernig verður þetta?'. Maður átti ekki von á því að við værum með fjögurra stiga forskot á KR þegar 17 umferðir eru búnar. Ég ber mikla virðingu fyrir því sem KR er að gera en hérna í dag mættust ólíkir leikstílar og ÍBV var sterkara liðið."
Láki kláraði viðtalið á léttum nótum og sagði að leikmenn ÍBV væru með fullt leyfi til að skemmta sér á Þjóðhátíð. Hann hefur engar áhyggjur af leikmönnum sínum.
„Þetta eru kórdrengir miðað við það sem var. Kvöldið er frjálst eins og maðurinn sagði."
Athugasemdir
