Enski leikmaðurinn Mason Greenwood er enn í tímabundnu banni hjá Manchester United og er áfram laus gegn tryggingu á meðan lögreglan rannsakar mál hans en þetta staðfesti Man Utd við Mirror í gær.
Þessi tvítugi sóknarmaður var handtekinn í janúar grunaður um gróft ofbeldi og nauðgun í garð kærustu sinnar.
Kærasta hans birti myndir af áverkum sínum og fullyrti að Greenwood væri á bakvið verknaðinn en auk þess fylgdi hljóðupptaka þar sem leikmaðurinn neyðir hana til að stunda samræði við sig.
Lögreglan handtók Greenwood í kjölfarið og hefur hann verið í tímabundnu leyfi hjá United síðan.
Einhver orðrómur var um það á Twitter í gær að rannsóknin yrði felld niður á næstu dögum og að leikmaðurinn væri klár í að ferðast með United í æfingaferðalag í næsta mánuði en United hafnar því.
Rannsókn málsins er enn í gangi og hefur ekkert breyst varðandi stöðu hans.
Athugasemdir