Ítalski fréttamaðurinn Gianluca Di Marzio, sem starfar fyrir Sky á Ítalíu, greinir frá því að Manchester City ætli að nýta riftunarákvæðið sem er í samningi Dani Olmo við RB Leipzig.
Hinn 26 ára gamli Olmo hefur hrifið áhorfendur með frammistöðu sinni á Evrópumótinu í Þýskalandi, en hann er með riftunarákvæði í samningi sínum við RB Leipzig sem gildir til næsta laugardags.
Á sunnudaginn eftir viku fellur söluákvæðið úr gildi og þá mun Leipzig geta hafnað tilboðum í leikmanninn sinn.
Þangað til verður Olmo falur fyrir 60 milljónir evra, en Pep Guardiola þjálfari Man City hefur miklar mætur á honum.
Olmo vill ólmur skipta yfir til stærra félags en hann á þrjú ár eftir af samningi sínum við Leipzig.
Olmo hefur í heildina spilað 148 leiki fyrir Leipzig, skorað í þeim 29 mörk og gefið 34 stoðsendingar. Hann er kominn með þrjú mörk og tvær stoðsendingar í fjórum leikjum á EM eftir að hafa verið settur inn í byrjunarliðið til að fylla í skarðið fyrir meiddan Pedri.
Þess má geta að Fabrizio Romano, samlandi og kollegi Gianluca Di Marzio, segir þessar fregnir ekki vera réttar. Hann segir að Man City hafi engan áhuga á Dani Olmo, en það séu önnur félög reiðubúin til að berjast um hann.
Athugasemdir
