Sverrir Ingi Ingason hélt hreinu gegn Giannina í dag
Íslenski landsliðsmaðurinn Sverrir Ingi Ingason spilaði allan leikinn er gríska liðið PAOK vann Pas Giannina 2-0 í úrvalsdeildinni í dag. Hann lagði þá upp fyrra mark liðsins.
Sverrir var í hjarta varnarinnar hjá PAOK en þessi öflugi miðvörður skoraði í síðasta leik liðsins í 2-2 jafnteflinu gegn Apollon Smyrnis.
Hann og liðsfélagar hans náðu að halda hreinu gegn Giannina í dag en auk þess gerði liðið tvö mörk. Sverrir átti stoðsendinguna í fyrra markinu en hann átti langa sendingu á Andrija Zivkovic sem keyrði inn í teig og skoraði örugglega.
Sverrir hefur verið einn af lykilmönnum PAOK en hann hefur spilað 29 leiki í öllum keppnum og skorað 5 mörk.
PAOK er í 4. sæti grísku deildarinnar með 43 stig en bæði Aris og AEK eru með sama stigafjölda en betri markatölur og sitja því í 2. og 3. sætinu. Olympiakos er í efsta sætinu með 57 stig.
Athugasemdir
