Mbappe, sem er 22 ára gamall, er einn besti knattspyrnumaður heims en samningur hans við PSG rennur út árið 2022.

Hann hefur verið orðaður við félög á borð við Barcelona, Real Madrid og Liverpool undanfarna mánuði en talið er líklegt að félögin reyni við hann í sumar, þegar hann á ár eftir af samningnum.

Mbappe hefur verið að skoða málin en samkvæmt Diario Sport mun hann virða samninginn við PSG. Hann mun því ekki yfirgefa félagið fyrr en á næsta ári og hefur gefið eigendum félagsins loforð fyrir því að hann hafi ekki náð samkomulagi við annað félag.

Umboðsmaður Mbappe hefur unnið með honum og foreldrum hans í að finna rétta félagið fyrir hann en það þykir líklegast að þau mál verði sett í biðstöðu og að hann klári næsta tímabil með PSG.

Framherjinn var keyptur frá Mónakó árið 2017 fyrir 180 milljónir evra og því ljóst að PSG myndi tapa miklum peningum á að leyfa honum að fara frítt árið 2022.