„Þetta var bara nokkuð jafn í fyrri hálfleik fannst mér. Létum boltann ganga og gekk frekar hægt. Vorum að venjast vellinum aðeins, en vorum að reyna hluti sem að ég bað þá um að gera og það sem við höfum verið að gera í allt sumar. Fáum á okkur mark og hefðum átt að koma í veg fyrir það. Annars fannst mér strákarnir standa sig vel og þeir bættu bara í í seinni hálfleik, lögðu allt í þetta - en töpuðum 2-1, það gerist,'' sagði Olgeir Sigurgeirsson, aðstoðarþjálfari Lengjudeildarmeistara Fylkis, eftir 2-1 tap gegn Þór í dag.
Lestu um leikinn: Þór 2 - 1 Fylkir
Fylkismenn sóttu hart að Þórsurum í leit að sigurmarkinu og pendúllinn virtist sveiflast ansi þungt með Fylki og undirrituðum fannst mark liggja í loftinu Fylkismegin. En þeir fengu mark í andlitið í staðinn.
„Já, sammála því. Mér fannst það bara tímaspursmál hvort að við myndum skora eða ekki. En eins og ég segi, þetta er fótbolti og þetta getur gerst. En við gáfum allt í þetta og strákarnir reyndu. Þeir eiga hrós skilið fyrir þennan leik, en voru óheppnir.''
Þrátt fyrir tap í dag þá hefur Fylkisliðið verið besta lið deildarinnar og vinna hana verðskuldað. Hvernig metur Olgeir tímabilið?
„Tímabilið er búið að vera frábært. Strákarnir eru búnir að standa sig ótrúlega vel og eiga allt hrós skilið. Þeir eru búnir að leggja á sig gríðarlega vinnu og hafa vaxið með hverjum leiknum sem að hefur liðið. Ótrúlega spennandi lið, góðir strákar og góðir í fótbolta. Geta bætt sig mikið og ef að þeir leggja mikið á sig og æfa vel - þá er bara allt mögulegt fyrir þessa drengi.''
Olgeir segist jafnframt búast við því að halda öllum lykilmönnum og að bæta svo í hópinn.
„Algjörlega. Við ætlum að halda þessu liði sem að við erum með. Það er númer eitt, tvö og þrjú. Ef að það eru einhverjir sem að við finnum, eða eru á lausu, þá skoðum við það. En númer eitt, tvö og þrjú er að halda þessum strákum sem eru hérna hjá okkur,'' sagði Olgeir að lokum.
Viðtalið má sjá í heild sinni í spilaranum hér að ofan.
