„Dómarar í þessari keppni eru langt frá gæðum leikmanna því miður"

Eiður Ben Eiríksson, annar af þjálfurum Vals, var til viðtals eftir leikinn í gær og var viðtalið birt með fyrirsögninni: „Vandræðalegt ef dómgæsla er komin svona stutt í kvennaboltanum." Viðtalið í heild sinni má nálgast hér að neðan en þar segir Eiður m.a.:

„Í seinni hálfleik þá tókum við yfir en þær skora mark sem er bara algjör brandari að hafi ekki verið dæmt af... Öll lítil atriði. Maður veit ekki hvað maður á að segja og verður að passa sig svolítið. En það er bara vandræðalegt ef dómgæsla er komin svona stutt í kvennaboltanum. Þetta var allan leikinn. Við fengum aldrei aukaspyrnu en auðvitað þarf maður að horfa á þetta aftur og er hliðhollur sínu liði en þetta var allan leikinn, brot út um allt og þær þurftu bara að öskra og kalla á spjöldin. Hún bar rosalega virðingu fyrir þeim sem er mjög skrýtið því við vorum á heimavelli og miklu betra liðið.“

Kolbeinn Tumi Daðason, fréttastjóri á Vísi, sagði á Twitter að Valur hefði átt að fá dæmt augljósasta víti í heiminum þegar Hlín Eiríksdóttir var klippt niður. Atvikið má sjá í spilaranum hér að neðan.

Þorsteinn Halldórsson, þjálfari Breiðabliks, svarar tísti Kolbeins á eftirfarandi hátt: „Sorglegt að horfa á þetta. Dómarar í þessari keppni eru langt frá gæðum leikmanna því miður. Ég var yfirleitt með blóðuga tungu eftir leiki, þurfti að bíta svo fast."

Sorglegt að horfa á þetta. Dómarar í þessari keppni er langt frá gæðum leikmanna því miður. Ég var yfirleitt með blóðuga tungu eftir leiki, þurfti að bíta svo fast.

— Thorsteinn Halldorss (@SteiniHalldorss) November 18, 2020