„Mér líður mjög illa að hafa tapað þessum leik. Þetta eru vonbrigði.“ sagði Sindri Kristinn Ólafsson, markmaður FH, eftir 2-1 tap gegn KR í dag.
Lestu um leikinn: FH 1 - 2 KR
Leikurinn í dag var án efa leikur tveggja hálfleikja. En afhverju var FH-liðið svona slappt í fyrri hálfleik en góðir í þeim seinni?
„Við gefum fyrri hálfleikinn og erum hreint út sagt ömurlegir. Við leyfðum þeim bara að koma. Í þau skipti sem við reyndum að spila gáfum við þeim bara boltann. Þeir hefðu getað refsað okkur meira.“
Það átti sér stað mjög umdeilt atvik í fyrri hálfleik þegar Helgi Mikael, dómari leiksins, dæmir vítaspyrnu fyrir KR. Sindri Kristinn var brotlegur en hann vill meina að þetta hafi verið hrein og bein mistök hjá dómaranum, Helga.
„Ég er ósammála því að ég gef þessa vítaspyrnu því Helgi Mikael gefur þessa vítaspyrnu alveg gefins. Ég hoppa bara upp í boltann. Vissulega næ ég honum ekki alveg en ég á rétt að hoppa upp í þetta einvígi ef ég kýli hann ekki. Ég er ekki nálægt því að kýla manninn. Þetta eru bara hrein og bein mistök hjá Helga Mikael vil ég meina.“
Hvernig metur Sindri þessa byrjun á mótinu hjá FH?
„Heilt yfir vonbrigði. Við viljum værum til í að vera með 16 stig. Þá held ég að ég væri sáttur. Þetta er ekki nógu gott.“
Næsti leikur hjá FH er gegn Valsmönnum á Hlíðarenda.
„Það er bara geggjað að spila þessa stórleiki. Við þurfum bara að fara á Hlíðarenda og bæta upp fyrir leikinn í dag,“ sagði Sindri að lokum.
Viðtalið við Sindra má sjá í heild sinni í spilaranum hér að ofan.
