Eiður var 23 ára gamall þegar hann tók að sér sitt fyrsta starf sem aðalþjálfari en hann var ráðinn sem þjálfari kvennaliðs Fylkis áður en hann hætti ári síðar.

Hann var ráðinn aðstoðarþjálfari kvennaliðs Vals árið 2019 og varð tvívegis Íslandsmeistari með liðinu. Eiður hætti hjá Val eftir þetta tímabil og tók við Þrótti á mánudag.

„Já, klárlega. Það má horfa á þetta á ýmsa vegu, hvort maður er að fara á ská, áfram eða til hliðar, til þess að taka næsta skref. Ég taldi þetta mikilvægt fyrir mig sem þjálfara að taka þetta skref."

Hann hafði mikinn áhuga á því að fara að þjálfa í karlaboltanum á þessum tímapunkti og taldi að það væri réttast að fá nýjar áskoranir.

„Það hefði þurft að vera rosalega spennandi ef ég ætti að fara að þjálfa annað lið í Pepsi-deild kvenna. Ég sá það fljótlega að mig langaði að fara að þjálfa í karlaboltanum núna eins og staðan er í dag."

„Maður var oft á tíðum kominn í smá comfort-zone, búinn að vera á sama staðnum í þrjú ár og þekktu mann allir og við vorum að vinna alla leiki. Mér fannst þetta góður tímapunktur að gera eitthvað nýtt," sagði hann í lokin.

Þróttur Vogum spilar í Lengjudeildinni á næstu leiktíð eftir að hafa unnið 2. deildina í sumar.