England: Southampton náði jafntefli gegn Man City

Southampton tók á móti Englandsmeisturum Manchester City í síðasta leik dagsins í ensku úrvalsdeildinni og úr varð heljarinnar viðureign.

Bakvörðurinn Kyle Walker-Peters kom heimamönnum yfir eftir frábæra sókn snemma leiks og virtist Armando Broja vera að tvöfalda forystuna en markið ekki dæmt gilt vegna rangstöðu.

Man City komst nokkrum sinnum nálægt því að jafna án þess þó að takast ætlunarverk sitt fyrir leikhlé og staðan 1-0.

Broja komst nálægt því að tvöfalda forystu Southampton í upphafi síðari hálfleiks en hann setti boltann í stöngina úr dauðafæri. Aymeric Laporte jafnaði svo leikinn fyrir Man City eftir góða aukaspyrnu Kevin De Bruyne.

City komst nálægt því að krækja í sigurinn en heimamenn gáfust ekki upp og reyndu einnig að sækja sigurmark. Hvorugu liði tókst þó að skora og niðurstaðan 1-1 jafntefli.

City er þá með tólf stiga forystu á Liverpool á toppi deildarinnar á meðan Southampton siglir lygnan sjó í neðri hlutanum.