„Þetta eru þrjú risa stór stig. Það eru ekki eins miklir yfirburðir og þegar við mættum þeim síðast en mikið hjarta í liðinu og enn og aftur erum við slegnir niður," sagði Hallgrímur Jónasson þjálfari KA eftir dramatískan 3 - 2 sigur á Fram í Bestu-deildinni í kvöld.
Lestu um leikinn: KA 3 - 2 Fram
„Við eigum að skora allavega 3 mörk í fyrri hálfleik en fáum svo á okkur tvö mörk, annað virkilega ódýrt og hitt úr horni. Við fórum inn í hálfleik 2-1 undir og fannst það ekki sanngjarnt því þetta var jafn fyrri hálfleikur."
„Svo var seinni hálfleikur ekki eins góður að okkar hálfu og þeir náðu að halda okkur niðri og fengu fullt af hornum og svona. Það er bara svo mikill karakter í þessu liði og vilji að þrátt fyrir það komum við til baka og þrýstum þeim rosalega mikið niður í lokin. Skorum tvö mörk og það var æðislegt að sjá Danna setja þriðja markið í uppbótartíma. Það gerir virkilega mikið fyrir okkur."
Nánar er rætt við hann í spilaranum að ofan en KA var fyrir leikinn í botnsæti deildarinnar og Haddi sagði: „Ég er ánægður með karakterinn í strákunum, það er ekki auðvelt að vera neðstur í deildinni og vá svona högg aftur og aftur. Við náðum að koma okkur út úr því. Liðið er stútfullt af strákum sem þykja vænt um hvorn annan og félagið og þeir eru til í að leggja þetta á sig."
