„Við vorum steinsofandi í fyrri hálfleik en fengum alveg nokkur færi og þær líka. Ég held að þetta hafi verið sanngjarnt þó við höfum verið meira með boltann,“ sagði Fylkiskonan Ída Marín Hermannsdóttir í viðtali við Fótbolta.net eftir 1-1 jafntefli við Selfoss.

Lestu um leikinn: Fylkir 1 -  1 Selfoss

„Ég hélt að við værum vel stemmdar en síðan mættum við ekki til leiks en mér fannst við alveg vera góðar í seinni,“ sagði Ída Marín en Fylkisliðið var í brasi í fyrri hálfleik og mögulega heppið að vera ekki undir þegar flautað var til hálfleiks.

Á lokamínútu fyrri hálfleiksins fengu Fylkiskonur dæmda vítaspyrnu þegar Ída Marín féll við í teignum. Frá stúkunni séð virtist þetta rangur dómur en Ída Marín var ekki sammála því.

„Já, alltaf víti,“ svaraði hún þegar hún var spurð um hvort rétt hefði verið að dæma vítaspyrnu. Ída Marín fór svo sjálf á punktinn og skoraði sitt fjórða mark í sumar.

„ Ég var 100% á því að ég myndi skora. Ég skipti reyndar um horn á síðustu stundu því ég sá hana færa sig.“

Aðspurð um markmið sín varðandi markaskorun svaraði leikmaðurinn efnilegi:

„Ég setti mér markmið um að skora tíu og vonandi næ ég því. En ég vona líka bara að við höldum okkur uppi og okkur gangi vel.“

Nánar er rætt við Ídu Marín í sjónvarpinu hér að ofan.

STUÐNINGSSVEIT
FÓTBOLTA.NET

Boltinn er að byrja aftur!

Íslenski og enski boltinn byrja aftur í júní.

Enginn fjölmiðill fjallar eins mikið um fótbolta og Fótbolti.net.

Gakktu í stuðningssveitina og hjálpaðu okkur að tryggja áframhaldandi öfluga umfjöllun um fótbolta.

STYRKJA

Tweet

Senda a Facebook Hafdu samband Senda frétt Prenta frétt Frétta leit