Sonný hélt hreinu í kvöld eins og í öðrum leikjum sumarsins
„Þetta var bara fínt. Góður sigur og við spiluðum vel. Vorum svolítið lengi í gang en svo létum við boltann ganga og rúlluðum sigrinum heim,“ sagði Sonný Lára Þráinsdóttir, fyrirliði Breiðabliks, eftir 5-0 sigur á Þrótti á heimavelli.
Lestu um leikinn: Breiðablik 5 - 0 Þróttur R.
Blikar fara gríðarlega vel af stað inn í sumarið. Eru búnar að vinna fyrstu 6 leiki sína, skora 24 mörk og Sonný á enn eftir að sækja boltann í netið.
„Það er flott vörn fyrir framan mig og þetta gengur bara vel,“ sagði Sonný hógvær um frammistöðu sína í sumar en tölfræðin hennar eftir að hún kom til Breiðabliks er hrikalega góð.
Sonný var í kvöld að spila leik númer 200 fyrir Breiðablik og hélt uppá það með því að halda hreinu í enn eitt skiptið.
„Þetta er búið að vera ekkert smá gaman. Ég ætlaði nú bara að fara eitt ár í Breiðablik og svo ætlaði ég að hætta. En þetta er sjötta árið mitt!“ sagði Sonný sem fannst of gaman í boltanum til að hætta eftir fyrsta tímabilið í Kópavogi.
Við spurðum fyrirliðann að lokum út í sóknarlínu Breiðabliks en liðið hefur verið að skora mörk í öllum regnbogans litum.
„Ég væri ekki til í að fá þær á mig allavega. Þá væri ég örugglega ekki með clean sheet sko,“ sagði Sonný létt. „Þær eru ótrúlega flottar, með mikil gæði og það er gaman að horfa á þær.“
Nánar er rætt við markmanninn öfluga í spilaranum hér að ofan.
