Hinn 28 ára gamli Wilshere er án félags en hann segir að hann hafi enn mikið fram að færa á knattspyrnuvellinum. Hann hefur verið mjög óheppinn með meiðsli á sínum ferli en hann kom fram á sjónarsviðið hjá Arsenal einungis 16 ára gamall og var talinn mjög efnilegur.

Wilshere segir að hann hafi þurft að yfirgefa West Ham og komast í lið þar sem hann fengi að spila.

„Fólk mun segja það sem það vill og knattspyrnumenn fá vel borgað. En það að fá ekkert að spila hefur mikil áhrif á sjálfstraust þitt og þér líður illa. Það að vita að maður spilar ekki sama hvernig frammistaðan sé á æfingum er erfitt. Þó að liðið tapar 3-0 þá veistu að þú munt ekki fá sénsinn."

„Ég vildi ekki vera lengur í þessum aðstæðum og því var það rétt ákvörðun að fara frá West Ham."