Guðný Árnadóttir.
„Það er gaman að koma hingað að spila alvöru leiki á móti góðum liðum," sagði Guðný Árnadóttir, varnarmaður íslenska landsliðsins, í samtali við Fótbolta.net í dag.
Stelpurnar spila á föstudaginn gegn Danmörku í Þjóðadeildinni og nokkrum dögum síðar mæta þær Þýskalandi. Þetta verða tveir gríðarlega erfiðir leikir.
„Ég er bara bjartsýn. Síðasti leikur á móti Þýskalandi var erfiður, á útivelli. Við þekkjum þær betur núna og ættum að geta stoppað þær betur. Vonandi getum við gert betur í þeim leik."
Hún segir það gaman að koma heim á Laugardalsvöll og spila fyrir framan Íslendinga.
„Jú, mjög gaman. Ég var að lenda og það er geggjað að vera komin aftur. Ég er ótrúlega spennt að spila hérna í kuldanum á Laugardalsvelli á móti þessum sterku liðum," sagði Guðný.
„Við ætlum að spila góðan leik á móti Danmörku og koma svo fullar sjálfstraust á móti Þýskalandi."
Hægt er að sjá allt viðtalið í spilaranum hér fyrir ofan þar sem Guðný talar um tíma sinn hjá AC Milan og undanfarnar vikur þar.
