Spánn: Griezmann í essinu sínu í Villarreal - Glæsileg vippa

Tveimur leikjum er lokið í spænsku La Liga í dag. Barcelona vann 1-2 útisigur á Villarreal og Getafe lagði Huesca á útivelli.

Antoine Griezmann reyndist hetja Barcelona þegar hann skoraði bæði mörkin í sigri gestanna í Villarreal í dag. Samuel Chukweze kom Villarreal yfir á 26. mínútu en Griezmann jafnaði á 28. mínútu og skoraði sigurmarkið á 35. mínútu.

Jöfnunarmarkið var glæsileg vippa yfir Sergio Asenjo en það sigurmarkið kom eftir slæm varnarmistök heimamanna, léleg sending til baka endaði hjá Griezmann sem skoraði. Manu Trigueros fékk að líta rauða spjaldið hjá gulum á 65. mínútu eftir ljótt brot á Lionel Messi.

Smelltu hér til að sjá rauða spjaldið.
Smelltu hér til að sjá vippuna laglegu.

Barcelona er með 71 stig, tveimur stigum minna en topplið Atletico Madrid sem spilar í kvöld.

Huesca er þá áfram í fallsæti eftir 0-2 tap gegn Getafe á heimavelli. Enes Unal skoraði bæði mörk Getafe í leiknum.

Loks var Diego Jóhannesson í byrjunarliði Real Oviedo þegar liðið tapaði 0-1 gegn Girona í B-deildinni. Diego lék fyrstu 67 mínútur leiksins.