Brasilíska fótboltakonan Formiga er að leggja landsliðsskóna á hilluna eftir magnaðan feril. Hún hefur spilað á sjö heimsmeistaramótum og sjö Ólympíuleikunum. Það hefur ekki verið kvennafótbolti á Ólympíuleikum sem hún hefur ekki tekið þátt í.
Hún er 43 ára og mun í dag leika sinn síðasta landsleik, gegn Indlandi í Manaus í Amazon frumskóginum.
Formiga, sem var sautján ára þegar hún spilaði sinn fyrsta landsleik fyrir Brasilíu, lagði landsliðsskóna reyndar fyrst á hilluna 2016 en tók þá fram að nýju tveimur árum síðar.
Hún hefur leikið 233 landsleiki og er að sjálfsögðu leikjahæst í sögu Brasilíu. Hún hefur unnið tvenn silfurverðlaun á Ólympíuleikum, 2004 og 2008. Hún varð í öðru sæti á HM 2007 og vann sex Copa America titla.
Athugasemdir
