„Vinir mínir, Veigar og Andrés, eru að þjálfa liðið. Mig langar að prófa vera með, láta reyna á hnéð og sjá hvort ég geti æft," segir Gaui við Fótbolta.net.

„Það á eftir að koma í ljós hvernig skrokkurinn er. Ef ég get hjálpað það, þá er það snilld. En ef hnéð er ennþá eins og það var þegar ég hætti þá verður ekkert úr þessu. Við ákváðum allavega að prófa þetta."

„Ég er allavega mættur í KFG golfmótið, það var fyrst á dagskrá," segir Gaui léttur. Hann var á miðjum golfhring þegar fréttamaður heyrði í honum hljóðið.

„Við sjáum hvernig þetta þróast. Fyrsta æfing er á mánudaginn og svo er leikur á miðvikudaginn," segir Gaui. KFG á leik gegn Þrótti Vogum á heimavelli á miðvikudagskvöld.

Guðjón er 38 ára og lék sem framherji á sínum ferli. Hann lék með Stjörnunni og KR á Íslandi og lék sem atvinnumaður í Svíþjóð, Danmörku og í nokkra mánuði á Indlandi. Þá lék hann fjóra A-landsleiki.

Þess má geta að Alexander Máni, sonur Guðjóns, er leikmaður Stjörnunnar og lék sinn fyrsta keppnisleik með meistaraflokki í maí. KFG er venslafélag Stjörnunnar.