Pep Guardiola, stjóri City, ætlar sér að gera talsvert af breytingum fyrir leikinn gegn Newcastle á morgun. Talsvert er um meiðsli hjá City og gætu nokkrir minna þekktir leikmenn spilað. Guardiola hefur staðfest að Phillips muni vera í byrjunarliðinu í leiknum.

„Þetta er mögulega stærsta vikan mín á Man City ferlinum til þessa," sagði Phillips eftir leikinn gegn Forest. Að mati greinarhöfunds hjá Athletic þá er ekkert „mögulega" í þessu. Þetta er einfaldlega stærsta vika Phillips frá komu hans frá Leeds.

Phillips er 27 ára miðjumaður sem byrjaði einungis fjóra úrvalsdeildarleiki á síðasta tímabili. Nú þarf hann að sýna að Guardiola geti treyst á hann.

„Þegar ég mætti í undirbúningstímabilið þá sagði ég að ég vildi vera áfram og reyna aftur að sanna mig. Það hefur verið mikið um það að leikmenn hafa staðið sig vel á öðru tímabili sínu hjá City. Ég ræddi við félagið og menn voru opnir með að ég mætti fara á láni ef ég vildi það. Ég neitaði því, vildi einbeita mér að City."

Leikmenn eins og Nathan Ake og Jack Grealish stigu upp á öðru tímabili sínu hjá City. Þeir hafa verið hvatning fyrir Phillips. Vikan framundan er tími fyrir Phillips að komast úr þeim farvegi sem ferill hans hjá City hefur verið, komast í stærra hlutverk.

Það að félagið hafi verið tilbúið að hleypa Phillips í burtu á láni sýnir að félagið hefur enga ofurtrú á leikmanninum. Þar sem liðið er án John Stones, Kevin De Bruyne, Mateo Kovacic, Bernardo Silva og Rodri þá eru allar líkur á því að Phillips fái tækifærið í vikunni.