Lestu um leikinn: Vestri 0 -  2 Grindavík

Grindvíkingar hafa gert vel í byrjun móts og eru með 10 stig eftir fjóra leiki og ekki enn fengið á sig mark.

Óskar Örn Hauksson gerði bæði mörk gestanna í leiknum en Helgi var sérstaklega ánægður við liðsframmistöðuna í dag.

„Mjög ánægður að koma hingað og vinna og halda áfram að halda okkar sigurvenjum. Það er mjög erfitt að koma hingað og vinna en við gerðum það mjög vel í dag. Þeir sköpuðu sér lítið sem ekkert á okkur og fengu eitt skot í slánna í lok leiks og eitt færi sem markvörðurinn okkar gerði mjög vel í að verja í seinni hálfleiknum en heilt yfir fannst mér við heldur sterkari.“

„Þá má aldrei gefa Vestra eitt né neitt í þessu því þeir hætta aldrei en það sem ég var mjög ánægður með var liðsframmistaðan og hvernig menn eru tilbúnir að vinna fyrir hvorn annan. Við lentum í meiðslum í leiknum og þá koma menn inn og berjast fyrir málstaðinn og það er það sem maður horfir í. Liðið er að vinna sem ein heild og það veitir á gott,“ sagði Helgi í lokin við Fótbolta.net.