Manchester United tapaði fyrir Brentford, 3-1, í 6. umferð ensku úrvalsdeildarinnar á samfélagsvellinum í Lundúnum í dag. Sæti portúgalska stjórans Ruben Amorim er orðið verulega heitt eftir úrslit dagsins.

Liðin höfðu ekki farið allt of vel af stað á tímabilinu, en aðeins þrjú lið skildu liðin að fyrir leikinn.

Heimamenn sýndu mikla ákefð og baráttu strax í byrjun leiks og var það brasilíski sóknarmaðurinn Igor Thiago sem kom þeim á bragðið á 8. mínútu.

Jordan Henderson fleygði löngum bolta fram völlinn og yfir Harry Maguire sem reyndi að spila Thiago rangstæðan. Það upplegg klikkaði hjá Maguire og komst Thiago einn í gegn á móti Altay Bayndir.

Framherjinn smellhitti boltann efst í nærskeytin og kom Brentford í forystu.

Brentford reyndi að hamra járnið meðan það var heitt. Bayndir þurfti að taka á stóra sínum nokkrum sinnum með stuttu millibili, en var sigraður í annað sinn á 20. mínútu er Thiago hirti frákast í teignum eftir að Bayindir varði skot Kevin Schade.

Man Utd heppið að vera aðeins tveimur undir, en það gaf leiknum líf þegar Benjamin Sesko opnaði markareikninginn með United sex mínútum síðar.

Patrick Dorgu náði fyrirgjöfinni upp við endalínu og var Caomhin Kelleher, markvörður Brentford, í miklu basli með að blaka boltanum úr teignum.

Kelleher varði tvær tilraunir frá Sesko á nokkrum sekúndum en kom engum vörnum við þegar Sesko fékk boltann í þriðja sinn og skoraði hann þá nokkuð örugglega. Fyrsta mark hans fyrir United frá því hann kom frá Leipzig en hann hafði farið í gegnum sex leiki án þess að skora.

Brentford hafði fremur hægt um sig það sem eftir lifði fyrri hálfleiksins en United svo sem ekkert að skapa sér neitt af viti heldur og staðan 2-1 í hálfleik.

Hálftíma fyrir leikslok fékk Dango Ouattara dauðafæri til þess að koma Brentford í tveggja marka forystu eftir frábæran undirbúning Schade en skotið ekki nógu hnitmiðað og tókst Bayndir að verja.

Nokkrum mínútum síðar fengu United-menn vítaspyrnu er Nathan Collins togaði aftan í Bryan Mbeumo sem náði veikburða skoti rétt framhjá markinu. Craig Pawson, dómari leiksins, dæmdi ekki vítaspyrnu strax en fékk skilaboð um að þetta væri hreint og klárt víti.

Einnig var mögulegt rautt spjald á Collins skoðað þar sem hann var aftastur og rændi upplögðu tækifæri, en gult spjald var talinn sanngjarn dómur.

Bruno Fernandes fór á punktinn fyrir United en Kelleher sá við slakri vítaspyrnu hans í hægra hornið. Önnur spyrnan sem Fernandes mistekst að koma í netið á tímabilinu.

Í uppbótartíma gerðu Brentford-menn út um leikinn eftir hraða skyndisókn. Mathias Jensen fékk að dansa með boltann fyrir utan teiginn áður en hann skaut honum beint á markið en Bayindir illa staðsettur og sveif boltinn yfir hann og í netið.

Tapið þýðir að sæti Amorim er orðið verulega heitt og nú kominn á síðasta séns, en hann fær væntanlega leikinn gegn Sunderland um næstu helgi og framtíðin síðan ákveðin í landsleikjahlénu.

Flott frammistaða hjá Brentford sem er komið upp í 11. sæti með 7 stig, eins og Man Utd, sem er í 12. sætinu.