Cristiano Ronaldo skoraði bæði mörk Portúgala gegn Ungverjalandi er þjóðirnar mættust í undankeppni HM fyrr í kvöld.
Hann hefur þar með skorað 41 mark fyrir Portúgal í undankeppni HM og er orðinn sá markahæsti frá upphafi.
Carlos Ruiz frá Gvatemala er í öðru sæti með 39 mörk skoruð í undankeppni Norður-Ameríkuþjóða fyrir HM og kemur Lionel Messi svo í þriðja sæti með 36 mörk skoruð í undankeppni Suður-Ameríkuþjóða.
Þar á eftir kemur hinn íranski Ali Daei með 35 mörk í asísku undankeppninni og svo er Robert Lewandowski með 33 mörk fyrir Pólland í Evrópu.
Ronaldo skoraði fyrra markið eftir undirbúning frá Nélson Semedo og seinna markið eftir fullkomna fyrirgjöf frá Nuno Mendes.
Athugasemdir
