Rúnar Páll Sigmundsson
„Hún er súr en svona er bara fótboltinn. Við vissum það alveg að við vorum að koma á erfiðan útivöll en Grindavík fær ekki eitt færi í þessum leik. Þeir fá aukaspyrnu úti á kanti sem hann skoraði reyndar frábærlega úr en við reyndum hvað við gátum að jafna þetta en svona er fótboltinn, einstakur.“ Sagði Rúnar Páll Sigmundsson þjálfari Fylkis um niðurstöðuna eftir 1-0 tap Árbæinga gegn Grindavík suður með sjó fyrr í dag.
Lestu um leikinn: Grindavík 1 - 0 Fylkir
Aðstæður á Grindavíkurvelli voru erfiðar í dag. Talsverður vindur var á vellinum sem var þar að auki skraufaþurr og hafði það mikil áhrif á leikinn sem náði sér aldrei á flug og gekk Fylki erfiðlega að fóta sig á köflum.
„Já og báðum liðum. Ég man ekki eftir því að hafa komið og spilað hér í Grindavík í logni. En það er bara eins og það er. Við eigum eftir að fara á erfiða útivelli þar sem eru mismunandi aðstæður og við þurfum að vera tilbúnir í þann slag sem við vorum alveg í dag. Við spiluðum ágætlega á köflum og fengum fínar sóknir en náðum ekki að jafna leikinn.“
Tapið er það fyrsta hjá Fylki í sumar sem fagnaði góðum bikarsigri á ÍBV í vikunni.
„Mótið er bara rétt að byrja og það eru allir að vinna alla í þessari deild og þetta verður bara hörkudeild alveg fram í síðasta leik.“
Sagði Rúnar en viðtalið við hann má sjá hér að ofan.
Athugasemdir
