Leikmaðurinn meiddist gegn Juventus í úrslitaleik ítalska bikarsins fyrir tæpum tveimur vikum.

Hann var ekki klár í að spila úrslitaleik Evrópudeildarinnar þar sem Atalanta vann Bayer Leverkusen 3-0.

De Roon hefur nú staðfest fleiri slæmar fréttir. Hann var valinn í hollenska landsliðshópinn fyrir Evrópumótið en þarf nú að draga sig úr honum vegna meiðslanna.

„Ég hef aldrei upplifað aðra eins viku á mínum ferli eða mínu lífi sem hefur verið með jafn miklar hæðir og lægðir. Tapaði ítalska bikarnum, gat ekki spilað úrslitaleik Evrópudeildarinnar, vann Evrópudeildina og í þeirri alsælu eyddi ég miklum tíma með læknateyminu og þá kom bara í ljós að ég get ekki spilað á EM,“

„Ég kemst yfir þetta og mun horfa á hópinn og vini mína sem stuðningsmaður, en akkúrat núna er þetta erfitt. Áfram Holland,“ sagði De Roon á samfélagsmiðlum.

De Roon er fastamaður og fyrirliði hjá Atalanta. Hann spilaði alls 46 leiki á tímabilinu, þar af 45 í byrjunarliði.