Hildur Antonsdóttir
Landsliðskonan Hildur Antonsdóttir var ánægð með framlag liðsins í markalausa jafnteflinu gegn Kanada er þjóðirnar áttust við í vináttuleik í Murcia í kvöld.
Lestu um leikinn: Ísland 0 - 0 Kanada
Íslenska liðið varðist mjög vel í leiknum en það vantaði aðeins upp á herslumuninn í sóknarleiknum.
„Bara frekar góð viðbrögð. Mér fannst við spila varnarleikinn mjög vel en við höfum kannski alveg hluti til að bæta í sóknarleiknum.“
„Ég er mjög sátt með hann. Það fór mikil vinnsla í að vinna góðan varnarleik og það skilaði því að við fengum engin mörk á okkur. Þær fá eiginlega ekki neitt af færum. Við erum mjög ánægðar með það framlag,“ sagði Hildur við KSÍ.
Ísland fékk besta færið snemma í síðari hálfleik er markvörður Kanada sendi boltann beint á Karólínu Leu Vilhjálmsdóttur, sem brást bogalistin.
„Við gerðum margt flott í sóknarleiknum, en bara smá óheppni að ná ekki góðu skoti á markið. Það er fullt til að byggja ofan á og náðum að spila þær oft úr pressu og koma okkur í góðar stöður. Það vantaði bara markið.“
Hvað takið þið með ykkur úr þessum leik og inn í leikinn gegn Dönum?
„Varnarleikurinn var mjög góður, núll mörk og klára færin okkar. Við getum tekið það með okkur í næsta leik og skorað einhver mörk,“ sagði Hildur í lokin.
Athugasemdir
