Inter er búið að festa kaup á albanska miðjumanninum Kristjan Asllani sem er fenginn til að veita Marcelo Brozovic samkeppni á miðjunni.
Asllani vakti mikla athygli á sínu fyrsta tímabili í Serie A með nýliðum Empoli.
Þessi tvítugi miðjumaður sýndi mikil gæði og vakti hrifningu Inter sem er núna búið að festa kaup á honum.
Inter borgar 4 milljónir evra til að fá Asllani lánaðan með því skilyrði að hann verði keyptur eftir tímabilið fyrir 10 milljónir evra auk árangurstengdra aukagreiðslna.
Asllani er annar leikmaðurinn sem gengur í raðir Inter í sumar eftir að félagið tryggði sér Romelu Lukaku á lánssamningi.
Tæknilega séð keypti Inter einnig Joaquin Correa í sumar en hann kom frá Lazio í fyrra á lánssamningi með kaupskyldu, rétt eins og hjá Asllani núna.
Asllani spilaði aðeins 23 leiki með Empoli á síðustu leiktíð enda ungur að aldri. Hann á fjóra A-landsleiki að baki fyrir Albaníu.