Lengjudeildin: Lúkas Logi afgreiddi HK

Fjölnir tók á móti HK í Lengjudeildinni í kvöld og gátu gestirnir úr Kópavogi tekið yfir toppsætið með sigri.

Heimamenn í Grafarvogi mættu þó grimmir til leiks og tóku forystuna á 15. mínútu þegar Bruno Gabriel Soares varð fyrir því óláni að skalla aukaspyrnu frá Lúkasi Loga Heimissyni í eigið net.

Lúkas Logi átti eftir að reynast HK-ingum ansi erfiður og tvöfaldaði hann forystuna stundarfjórðungi síðar eftir góða fyrirgjöf frá Guðmundi Karli Guðmundssyni.

HK komst nálægt því að minnka muninn en tókst ekki og leið annar stundarfjórðungur að næsta marki. Aftur var Lúkas Logi á ferðinni, í þetta sinn eftir hornspyrnu, og staðan 3-0 í hálfleik.

HK-ingar komust nokkrum sinnum nálægt því að minnka muninn í síðari hálfleik og loks tókst Örvari Eggertssyni að skora á 82. mínútu en brekkan var alltof brött fyrir Kópavogsstrákana.

Lokatölur urðu 3-1 og mikilvæg stig í höfn fyrir Fjölni. Fjölnir er í fjórða sæti með 14 stig eftir 9 umferðir, einu stigi eftir HK sem á þó leik til góða.