Fótbolti.net ætlar að fjalla vel um aðra deildina í sumar eins og undanfarin ár og við ætlum að hita vel upp með því að birta spá fyrirliða og þjálfara í deildinni fram að móti.
Við fengum alla fyrirliða og þjálfara til að spá og fengu liðin því stig frá 1-11 eftir því en ekki var hægt að spá fyrir sínu eigin liði. Í sjöunda sæti í þessari spá var KS/Leiftur sem fékk 148 stig af 242 mögulegum. Kíkjum á umfjöllun okkar um KS/Leiftur.
7. KS/Leiftur
Búningar: Blá treyja, bláar stuttbuxur, bláir sokkar.
Heimasíða: http://www.siglo.is/ks og http://www.leiftur.is
Lokastaða í fyrra: 8.sæti í 2.deild
Eftir að hafa fallið úr fyrstu deildinni árið 2008 þá sigldi KS/Leiftur lygnan sjó í annarri deildinni í fyrra þar sem niðurstaðan varð að lokum áttunda sæti. Samkvæmt spá þjálfara og fyrirliða mun KS/Leiftur einnig sigla lygnan sjó í sjöunda sætinu í ár en menn þar á bæ stefna hins vegar ofar.
KS/Leiftur hefur haldið flestum leikmönnum sínum síðan í fyrra og auk þess fengið nokkra leikmenn til liðs við sig í vetur. Þorvaldur Sveinn Guðbjörnsson er kominn aftur í vörnina eftir að hafa leikið með KA í fyrra og kantmaðurinn Þorsteinn Þorvaldsson er kominn til KS/Leifturs frá Magna.
Gamla kempan Hörður Már Magnússon skipti á dögunum yfir í KS/Leiftur. Hörður, sem er 38 ára, lék með Leiftri á sínum tíma og þekkir til fyrir Norðan. Serbneski miðjumaðurinn Milan Lazarevic kom líka til KS/Leifturs á dögunum en hann mun væntanlega fylla skarð Guðjóns Gunnarssonar sem var í láni frá Breiðablik á síðustu leiktíð. Einnig hefur KS/Leiftur fengið aftur nokkra unga Ólafsfirðinga og Siglfirðinga sem hafa leikið með öðrum félögum í öðrum flokki undanfarin ár.
Í fyrra var þjálfarinn Ragnar Hauksson allt í öllu í sóknarleik KS/Leifturs. Ragnar, sem er 34 ára, var markahæstur í annarri deildinni í fyrra en hann skoraði 18 af 44 mörkum KS/Leifturs og skapaði auk þess mörg marktækifæri. Ragnar skoraði fimm mörk í jafnmörgum leikjum í Lengjubikarnum í vor og ljóst er að hann verður afar skeinuhættur í fremstu víglínu í sumar líkt og undanfarin ár.
Í fyrra var Benis Krasniqi næstmarkahæstur hjá KS/Leiftri með sex mörk en hann er horfinn á braut til Reynis Sandgerði. Aðrir leikmenn skoruðu fjögur mörk eða minna í fyrra og því er mikilvægt fyrir KS/Leiftur að aðrir leikmenn finnni líka markaskóna til að ábyrgðin frammi liggi ekki öll á Ragnari.
Auk Ragnars hefur KS/Leiftur reynslubolta eins og fyrirliðann Agnar Sveinsson, Hörð Má, Heiðar Gunnólfsson og Þorvald Svein Guðbjörnsson en þessir leikmenn hafa marga fjöruna sopið í boltanum í gegnum tíðina.
Breiddin hjá KS/Leiftri er betri en oft áður og ekki er loku fyrir það skotið að liðið eigi eftir að fá meiri liðsstyrk fyrir leikinn gegn Víði í fyrstu umferð um næstu helgi. KS/Leiftur ætti því að hafa leikmannahóp til að gera atlögu að því að fara ofar en í fyrra.
Stígandi hefur verið í leik KS/Leifturs í vetur og hársbreidd munaði að liðið kæmist í undanúrslit Lengjubikarsins. KS og Leiftur hafa bæði leikið í efri deildum í gegnum tíðina auk þess sem sameinað lið félaganna lék í fyrstu deildinni 2008 og ljóst er að metnaður er fyrir því að ná lengra í Fjallabyggð en spáin segir til um.
Styrkleikar. Leikmannahópurinn virðist sterkari hjá KS/Leiftri en í fyrra og breiddin er meiri auk þess sem heimamenn eru í stóru hlutverki. Ragnar er einn öflugasti framherji deildarinnar og hann skilar alltaf fullt af mörkum. Reynslan ætti einnig að vera styrkur hjá KS/Leiftri en liðið hefur nokkra leikmenn sem hafa leikið í fyrstu og efstu deild.
Veikleikar: Það getur verið erfitt að halda úti sameiginlegu liði en 50 mínútna keyrsla er á milli Ólafsfjarðar og Siglufjarðar. Æfingaaðstaðan hefur ekki verið upp á það besta í vetur og því gæti tekið smá tíma að slípa liðið saman. Útivöllurinn var ekki besti vinur KS/Leifturs í fyrra þar sem liðið náði einugis í tvo útisigra.
Ragnar Hauksson hefur verið spilandi þjálfari hjá KS/Leiftri frá því árið 2006 þegar hann tók við liðinu af Marko Tanasic. Ragnar hefur leikið með KS og síðar KS/Leiftri lengst af á ferlinum fyrir utan nokkur ár hjá ÍA.
Ragnar kom KS/Leiftri upp í fyrstu deild á sínu fyrsta ári sem þjálfari en liðið féll beint aftur og endaði síðan í áttunda sæti í annarri deildinni í fyrra. Ragnar er mjög mikilægur hlekkur í leik KS/Leifturs og ljóst er að mikið mun mæða á honum inni á vellinum í sumar sem og í þjálfuninni.
Lykilmenn: Agnar Þór Sveinsson, Ragnar Hauksson, Þorvaldur Sveinn Guðbjörnsson.
Komnir:
Aron Ingi Kristinsson frá KR á láni
Eiríkur Ingi Magnússon frá HK á láni
Hörður Már Magnússon frá Carl
Ingimar Elí Hlynsson frá Þór
Kristófer Númi Hlynsson frá Þór
Milan Lazarevic frá Hvöt
Þorsteinn Þorvaldsson frá Magna
Þorvaldur Sveinn Guðbjörnsson frá KA
Farnir:
Grétar Bragi Hallgrímsson í Draupni
Guðjón Gunnarsson í Breiðablik
Benis Krasniqi í Reyni S.
Spá fyrirliða og þjálfara:
1. ?
2. ?
3. ?
4. ?
5. ?
6. ?
7. KS/Leiftur 148 stig
8. Höttur 99 stig
9. Víðir Garði 80 stig
10. ÍH 73 stig
11. Hamar 50 stig
12. KV 35 stig
