Heimild: KSV Roeselare
Hólmar Örn Eyjólfsson.
Bjarni Þór Viðarsson endaði í þriðja sæti og Hólmar Örn Eyjólfsson hafnaði í fjórða sæti í kjöri á bestu leikmönnum belgíska liðsins KSV Roeselare á síðasta keppnistímabili. Stuðningsmenn félagsins stóðu að kjörinu en úrslitin voru kunngjörð í dag.
Bjarni hlaut 28 stig og Hólmar 24 en stig voru gefin hverjum leikmanni í lok hvers mánaðar á keppnistímabilinu.
Árangur Hólmars kemur nokkuð á óvart þar sem hann gekk til liðs við Roeselare á láni frá West Ham í janúar og spilaði því einungis hálft keppnistímabilið með liðinu. Hann stóð sig hins vegar frábærlega og var einn besti leikmaður liðsins á síðari hluta keppnistímabilsins.
Fimm bestu leikmenn KSV Roeselare á síðasta keppnistímabili:
1. Joeri Dequevy, 51 stig
2. Mahamdou Dissa, 47
3. Bjarni Þór Viðarsson, 28
4. Hólmar Örn Eyjólfsson, 24
5. Vincent Provoost, 20
