Gylfi Þór Sigurðsson, leikmaður Everton og landsliðsmaður Íslands, talar vel um Ísland og segir að hann sé farinn að hugsa fram í tímann um að flytja heim aftur.
Gylfi var í viðtali við Sportveiðiblaðið en þar er rætt við hann um áhuga hans á stangveiði og framtíðaráformin.
„Ég er búinn að búa lengur hér úti heldur en á Íslandi. Maður er alveg farinn að hugsa fram í tímann þegar maður hættir í boltanum og flytur heim aftur," sagði Gylfi á meðal annars í viðtalinu.
„Ég hlakka mjög mikið til að koma aftur heim. Þetta hefur aðeins verið að ágerast síðustu árin og þar spilar veiðin líka sterkt inn í. Íslensk náttúra er svo ótrúleg og togar í mig. Ég hlakka alveg til að geta hitt fjölskyldu og vini aftur án þess að þurfa alltaf að vera að drífa sig innan tveggja vikna á hverju sumri," sagði Gylfi við Sportveiðiblaðið.
Gylfi og félagar í Everton mæta Aston Villa í ensku úrvalsdeildinni í kvöld klukkan 19.
Athugasemdir