Fótbolti.net náði tali af Theodóri Sveinjónssyni þjálfara Aftureldingar eftir 4-0 tapið gegn Breiðablik í Pepsi-deildinni fyrr í kvöld. Við spurðum Tedda út í leikinn.
„Svekkjandi og ekki svekkjandi. Það getur náttúrulega enginn búist við því að koma hér á Kópavogsvöll og spila á móti þessu frábæra Breiðabliksliði og fá eitthvað út úr því. Við héldum þeim til baka í fyrri hálfleik. Fengum þarna eitt klaufamark á okkur þar sem við vorum í bíó að borða popp og kók í stað þess að setja pressu á manninn með boltann þegar markmaðurinn var kominn af línu. En fyrir utan það þá héldum við þeim frá okkur í fyrri hálfleik allavegana.“
„Svo vorum við ekki tilbúnar þegar leikurinn byrjaði og fengum mark strax á okkur. Ég hefði viljað fá aðeins öðruvísi úrslit. Það var mikið lagt í þennan leik. Mikil varnarvinna en þetta er gott Breiðablikslið og þær refsa manni eins og skot.“
Fyrri hálfleikur var vel leikinn af hálfu Aftureldingar en liðið gaf eftir í þeim síðari. Aðspurður sagðist Teddi hafa þurft að gera breytingar á liðinu sem riðluðu leik liðsins.
„Ég þarf að taka fyrirliðann útaf. Hún byrjaði leikinn svona hálftæp. Lilja sem er í láni hjá okkur hefur verið að spila þessa stöðu og má náttúrulega ekki spila á móti sínu gamla liði, sem er eðlilegt vegna samninga. Ég læt fyrirliðann minn, Söndru Dögg, sem er hálftæp fara í þessa stöðu. Það riðlaði svolítið okkar leik en það á maður að koma í manns stað og við hefðum þurft að gera betur.“
Umdeilt atvik átti sér stað eftir rúmlega hálftímaleik en þá virtist Aldís Kara Lúðvíksdóttir leikmaður Breiðabliks sparka til Helen Lynskey án þess að boltinn væri nærri. Stuðningsmenn Aftureldingar létu heyra í sér í stúkunnni þegar Bríet Bragadóttir lyfti aðeins gulu spjaldi á Aldísi fyrir brotið. Við spurðum Tedda út í atvikið.
„Maður er náttúrulega búinn að upplifa það dálítið í deildinni að litlu liðin fá litla hjálp. Ég fer til Akureyrar þar sem leikmaður minn kemst einn á móti markmanni í byrjun leiks, á áttundu mínútu. Markmaðurinn tekur hana niður. Tekur ekkert boltann og leikmaðurinn minn fær gult spjald fyrir leikaraskap. Það er náttúrulega game changing hlutur og aftur núna. Aldís Kara er frábær leikmaður en gleymir sér í smá stund og sparkar í átt að leikmanni hjá mér þegar boltinn er ekki nálægt. Ég spurði dómarann af hverju hún dæmdi ekki rautt og hún sagði að hún hefði ekki verið að sparka í átt að leikmanninum. Dómarinn dæmir og tekur ákvarðanir um þetta en eins og ég segi þá var þetta rautt spjald fyrir mér. En dómarinn ræður.“
„Við höldum bara áfram að vinna í okkar hlutum og því sem við þurfum að vinna í. Við höldum áfram að berjast. Við vissum að þetta yrði erfið fjallganga og það kemur mér ekkert á óvart. Við þurfum að berjast öllum stigunum en ég get lofað hinum liðunum að þau þurfa að hafa fyrir því að spila á móti okkur og við höldum bara áfram. Þetta er bara einn leikur af mörgum og við gefumst ekkert upp.t Þær eru vanar þessu í Mosó,“ sagði Theodór að lokum en hægt er að horfa á viðtalið við hann í sjónvarpinu hér að ofan.
Athugasemdir
