Leuven er komið áfram í átta liða úrslit belgíska bikarsins eftir stórsigur á Herent í dag.
Diljá Ýr Zomers var í byrjunarliði Leuven og hún kom liðinu í 2-0 þegar hún skoraði með skalla. Leiknum lauk með öruggum 6-1 sigri liðsins.
Lára Kristín Pedersen gekk til liðs við Club Brugge í síðasta mánuði. Hún var í byrjunarliðinu þegar liðið vann 4-2 gegn Waregem í kvöld en liðið var 2-0 undir í hálfleik.
Þórdís Elva Ágústsdóttir kom inn á sem varamaður þegar hálftími var til leiksloka í 4-1 tapi Vaxjö gegn Hammarby í sænsku deildinni.
Þórdís þurfti hins vegar að fara aftur af velli fiimm mínútum fyrir lok venjulegs leiktíma.
Liðið er í 10. sæti með 27 stig fyrir lokaumferðina en liðið hefur þegar bjargað sér frá falli.
Athugasemdir
