53 úrvalsdeildarleikmenn meiddust yfir hátíðarnar og er verið að skoða 17 aðra sem gætu mögulega verið meiddir eftir að hafa orðið fyrir hnjaski. Aðeins er talið leikmenn sem verða frá í viku eða meira.

Leikjaálagið yfir hátíðarnar hefur verið svakalegt þar sem úrvalsdeildarfélög þurftu mörg hver að spila fjóra leiki á tólf dögum. Þegar minnst leið á milli leikja fengu leikmenn aðeins 46 klukkustunda hvíld.

„Yfirvöld í knattspyrnuheiminum verða, í samráði við félög og deildakeppnir, að gera eitthvað í þessu ástandi. Það er ekki hægt að spila fótbolta án leikmanna og það verður að gæta hagsmuna þeirra þegar það kemur að leikjaálagi," segir Bobby Barnes, forseti FIFPro í Evrópu og framkvæmdastjóri ensku leikmannasamtakanna.

Son Heung-min, Sadio Mane og Alisson Becker eru dæmi um úrvalsdeildarleikmenn sem spiluðu yfir 70 leiki í fyrra og ferðuðust yfir 80 þúsund kílómetra til að spila á árinu. Þess vegna hafa alþjóðlegu leikmannasamtökin lagt fram fjórar uppástungur.

1) Skylda leikmenn til að taka sér frí. Fjórar vikur í frí á milli leiktíða og tvær vikur í frí á miðri leiktíð.

2) Takmark á fjölda leikja sem leikmaður má spila í röð þegar hvíldardagar á milli leikja eru færri en 5.

3) Takmark á leikjafjölda yfir heilt dagatalsár.

4) Setja upp viðvörunarkerfi sem skyldar leikmenn til að hvíla sig þegar álagið er of mikið.