Fram hefur komist að samkomulagi við Westchester United, unglingaakademíu í New York fylki í Bandaríkjunum, um að Karen Dögg Hallgrímsdóttir keppi með liðinu á Viareggio Cup sem fer fram á Ítalíu.
Viareggio Cup er frægt unglingaliðamót sem er haldið árlega í fjallabæ í norðurhluta Ítalíu. Mótið fer fram 20. mars til 3. apríl og verður Karen Dögg fyrsti leikmaður Fram sem keppir á mótinu. Fleiri leikmenn Fram gætu fengið tækifæri til að keppa á þessu móti á komandi árum í ljósi samstarfs við Westchester United og umboðsfyrirtækið MAD Sports Management.
Karen er fædd 2008 og því aðeins á fimmtánda aldursári. Hún kom við sögu í einum leik með meistaraflokki Fram í Mjólkurbikarnum í fyrra.
Nánari upplýsingar um mótið má finna hér.
„Við óskum Karen innilega til hamingju með þetta flotta tækifæri og vitum að hún verður glæsilegur fulltrúi félagsins á Ítalíu," segir meðal annars í tikynningu frá Fram.
