Haukur er að fara að taka þátt á EM U19 landsliða með Íslandi, en hann er aðeins 17 ára gamall.

Hann ræddi við Fótbolta.net í gær um bræður sína, en hann var fyrst spurður út í Hákon sem leikur með FC Kaupmannahöfn í Danmörku. Hákon gerði frábæra hluti með FCK á síðasta tímabili og hefur vaxið gríðarlega sem leikmaður. Hann er núna sterklega orðaður við Lille í Frakklandi.

„Ég er mjög spenntur að sjá hvað gerist í framhaldinu hjá brósa. Hann var orðaður við Lille á eitthvað metfé. Hákon er virkilega góður leikmaður og ég horfi mikið upp til hans. Hann er stór fyrirmynd fyrir mig og ég er mjög spenntur að sjá hvað hann gerir," sagði Haukur.

Þeir eru með sama blóð og ég
„Þetta eru stóru bræður mínir og það væri skrítið ef ég myndi ekki sjá þá sem fyrirmyndir. Það er virkilega gaman að sjá þá báða standa sig svona vel á háu stigi. Það er hvatning fyrir mig að gera enn betur. Þeir eru með sama blóð og ég, og þá hlýt ég að geta þetta líka."

Hvorum er hann líkari?

„Ég er miklu líkari Hákoni. Við erum mjög líkir í útliti og allir kennararnir í framhaldsskóla kalla mig Hákon. Við erum einnig líkir í því hvernig við spilum, við viljum spila hratt og fá hann aftur. Tryggvi er bara algjör raketta á kantinum og markaskorari. Hann er mun líkari mömmu og við Hákon líkari pabba," sagði Haukur.

Hægt er að sjá viðtalið í heild sinni hér fyrir neðan en þar ræðir Haukur líka um ÍA og tímabilið þar.

Haukur er eins og áður segir hluti af U19 landsliðinu sem hefur leik í lokakeppni Evrópumótsins í dag. Liðið mætir Spáni klukkan 19:15.