„Mjög ánægður með úrslitin, mjög ánægður með frammistöðuna.“ sagði Nik Chamberlain, þjálfari Breiðabliks, eftir 4-0 sigur gegn FH í 12. umferð Bestu deild kvenna í kvöld.
Lestu um leikinn: FH 0 - 4 Breiðablik
„Stelpurnar spiluðu vel frá taktísku sjónarhorni. Við vissum að við þyrftum að breyta nokkrum hlutum frá okkar hefðbundna uppleggi og það heppnaðist vel.“
Katrín Ásbjörnsdóttir átti afar góðan leik í dag þar sem hún skoraði tvö mörk og átti stóran þátt í fyrsta marki Breiðabliks.
„Hún var frábær í dag. Hélt vel í boltanum og var góður uppspilspunktur þegar við þurftum á því að halda. Hún skoraði tvö mörk sem var fyllilega verðskuldað miðað við frammistöðuna.“
Það fór ekki framhjá neinum í dag að Heiða átti þónokkur skot. Hún skaut meðal annars í slánna eftir aukaspyrnu af 30 metra færi og átti góðan skalla sem var varinn glæsilega af Aldísi í marki FH. Nik var því spurður hvort þetta hefði verið hluti af upplegginu fyrir leik.
„Ég gef henni smá frjálsræði til þess að gera það sem hún vill. Hún átti eitt skot gegn Tindastóli í upphafi árs og skýtur í slánna í dag. Hún varð soldið gráðug í dag og leið eins og hún gæti gert reynt þetta tvisvar aftur þannig við þurfum kannski aðeins að halda henni á jörðinni. En hún er góður leikmaður þannig þetta sleppur af og til.“
Það hefur mikið mætt á liðinu undanfarin misseri en framundan er landsleikjapása.
„Klárlega, við höfum komist í gegnum þetta og erum búin að vera fylgjast með álaginu og passa að dreifa því milli leikmanna. Þannig pásan kemur á góðum tíma.“
Viðtalið má sjá í heild sinni í spilaranum hér að ofan.
