Pablo komst á blað í dag eins og margir aðrir.

Mynd: Fótbolti.net - Hafliði Breiðfjörð

Mynd: Fótbolti.net - Hafliði Breiðfjörð

Víkingur og Leiknir áttust við í Bestu deildinni í kvöld en þetta var frestaður leikur frá því fyrr í sumar.

Leikurinn í kvöld á Víkingsvelli var ótrúlegur en heimamenn unnu leikinn með hvorki fleiri né færri en níu mörkum.

Staðan var 5-0 í hálfleik en Ari Sigurpálsson gerði tvennu í honum. Hin mörkin í fyrri hálfleikunm skoruðu Erlingur Agnarsson, Logi Tómasson og Júlíus Magnússon.

Víkingar slökuðu ekkert á, langt því frá, en liðið bætti við fjórum mörkum í síðari hálfleiknum. Helgi Guðjónsson, Birnir Snær Ingason, Pablo Punyed og Danijel Dejan Djuric skoruðu mörkin.

„Víkingarnir eru ekkert hættir!! Pablo Punyed vinnur boltann við teigi Leiknis og kemur boltanum á Djuric sem setur boltann örugglega framhjá Viktori Frey.
Uppspilið hjá Leiknismönnum ekki að ganga í kvöld," skrifaði Anton Freyr Jónsson um níunda markið í beinni textalýsingu.

Víkingur er í öðru sæti deildarinnar, níu stigum á eftir Breiðablik en liðið hefur nú skorað flest mörk í deildinni.

Leiknir er í neðsta sætinu og hefur nú fengið á sig flest mörkin í Bestu deildinni til þessa.