Franski landsliðsmaðurinn Adrien Rabiot er án samnings eftir að hafa verið mikilvægur hlekkur í sterku liði Juventus undanfarin ár.
Það eru ýmis félög sem hafa áhuga á Rabiot en hann er ekki enn búinn að samþykkja neitt samningstilboð.
Talið er að einu félögin sem séu reiðubúin til að mæta launakröfum Rabiot séu í Sádi-Arabíu og var miðjumaðurinn orðaður við félagaskipti til Al-Nassr á dögunum.
Fabrizio Romano greinir hins vegar frá því að Rabiot hefur engan áhuga á því að spila í Sádi-Arabíu eða neinsstaðar utan fimm bestu deilda Evrópu á þessum tímapunkti ferilsins.
Rabiot var byrjunarliðsmaður hjá Paris Saint-Germain áður en hann skipti til Juventus á frjálsri sölu sumarið 2019. Hann er 29 ára gamall og á 48 leiki að baki fyrir franska landsliðið.
Rabiot gæti verið opinn fyrir því að skipta yfir til Sádi-Arabíu ef hann nær ekki samkomulagi við neitt evrópskt félag.
Hann hefur unnið flesta titla sem eru í boði á ferli sínum sem atvinnumaður í fótbolta, þó hann eigi enn eftir að sigra Evrópukeppni með félagsliði og EM eða HM með landsliðinu.
Athugasemdir
