Freyr Alexandersson, aðstoðarlandsliðsþjálfari.
„Þetta er í fyrsta sinn frá 2018 sem ég upplifi einhvers konar spennustig eða andrúmsloft sem tilheyrir stórmótum. Þannig er stemningin núna," sagði Freyr Alexandersson, aðstoðarlandsliðsþjálfari, í samtali við Stöð 2 Sport fyrir leikinn gegn Rúmeníu sem hefst eftir tæpan hálftíma.
Leikurinn er gríðarlega mikilvægur. Sigurliðið fer áfram í úrslitaleik umspilsins fyrir EM næsta sumar.
„Við erum ofboðslega einbeittir og ofboðslega hungraðir. Það sem maður hefur upplifað í gegnum þessi tvö stórmót, sú stemning er í gangi núna."
Um stöðuna á leikmannahópnum sagði Freyr: „Hingað til er allt í góðu standi."
Hvernig leggjum við þennan leik upp? „Við ætlum að vera þéttir þegar það á við og við þurfum að vinna þetta sem ein heild, vera fastir fyrir og ekki selja okkur í leikstöðunni einn á móti einum. Það er gríðarlega mikilvægt í þessum leik."
„Þá trúi ég því að við náum í sigur og það er það eina sem er í boði hérna, að ná í sigur. Við verðum að halda í gildin okkar og það sem við erum góðir í."
Athugasemdir
